مشكلات الثانوية العامة
في حاجات كتير بتعطل الطلاب عن المذاكره وعن التفوق الدراسي ، خليني أقول لحضراتكم على ال 10 حاجات اللي بتعطل الطلاب عن المذاكره والتفوق الدراسي بس يا ريت تقراهم كلهم لان ممكن يكون السبب اللي بيعطل عن المذاكره والتفوق الدراسي رقم واحد او خمسه او عشرة.
1-المشكلات الصحية
اول حاجه تعطل الطلاب عن التفوق الدراسي وجود مشكلات صحيه يعني لو الطالب عنده مشكله في النظر او السمع ومعالجهاش مش
هيقدر يذاكر كويس وبالتالي مش هيقدر يتفوق ، ولو عنده انيميا وماعالجهاش هيحس بالتعب والارهاق اثناء المذاكره ومش هيقدر ينتبه ويركز كويس وقت المذاكره.
ولو الطالب مثلا عنده نقص فيتامين دال ومعالجوش هيحس بالتعب العام والارهاق والكسل والخمول والرغبه في النوم وفقدان الشغف وربما الاكتئاب وبالتالي مش هيقدر يذاكر ومش هيقدر يتفوق دراسيا ولو في طالب عنده مرض مؤلم طبعا مخه هيركز على الالم ومحاوله تخفيفه اكثر من المذاكره والتفوق الدراسي.
2- المشكلات النفسية
ثاني حاجه تعطل الطلاب عن التفوق الدراسي وجود مشكلات نفسيه ، يعني لو الطالب مثلا بيعاني من القلق النفسي المرضي هيبقى متوتر ومش هيقدر يقعد على بعضه وهيبقى عنده توقع سلبي انه مش هينجح حتى لو ذاكر وهيبقى عنده نقص انتباه وتركيز و تذكر ولو الطالب مثلا عنده اكتئاب نفسي هيحس بفقدان الحماس والطاقه والشغف لاي شيء وهيكون طول الوقت حزين ومخنوق ومش قادر يذاكر.
ولو الطالب مريض بالوسواس القهري هيبقى طول الوقت مشغول بالفكره او الفعل الوسواسي وطبعا هيتشت تركيزه بين المذاكره والفكره اللي جايه من جوه ومش هيقدر يذاكر ولو الطالب كان عنده اضطراب فرط الحركه وتشت الانتباه في الطفوله وما تعالجش منه فغالبا هيستمر معاه للاعدادي والثانوي او هيتحول لاضطراب مسلك او اضطراب سلوك.
وبالتالي مش هيخليه يقدر يقعد فتره طويله للمذاكره لانه هيشعر بالملل بسرعه وطبعا تشتت الانتباه اللي عنده هيخليه ما يقدرش ينتبه ويركز ويخزن معلومات في الذاكره وبالتالي مش هيقدر يستدعيها لان المعلومات ما دخلتش مخه اصلا.
بالاضافه الى ان اللي عنده فرط حركه وتشتت الانتباه دايما ينتقد من كل اللي حواليه للاسف سواء في البيت او في المدرسه بسبب حركته الزايده وقله انتباهه وتركيزه ، فده يخليه يكره المذاكره اللي بتكون سبب في نقده وشعوره انه انسان فاشل المهم ان أي مشكله نفسيه يعاني منها الطالب تعطله عن التفوق الدراسي .
3- المشكلات الزواجية
ثالث حاجه تعطل الطلاب عن التفوق الدراسي وجود مشكلات زواجيه، لو في مشكلات زواجيه واسريه حوالين الطالب طبعا مش هيقدر يركز في المذاكره لانه هيبقى متضايق ومخنوق وحاسس بالقلق لعدم الاستقرار الاسري والطالب هيبقى قاعد بجسمه في المدرسه والدرس لكن عقله مشغول بالمشكلات اللي بين والده ووالدته.
4- فقدان الهدف
رابع حاجة تعطل الطلاب عن التفوق الدراسي عدم وجود هدف عند الطالب ، الانسان اللي ما عندوش هدف يعيش علشانه تبقى حياته بلا معنى والطالب اللي ما عندوش هدف يذاكر علشانه يبقى مذاكرته بلا معنى ، يعني يذاكر او ما يذاكر ما تفرقش عنده ، لازم يكون عند الطالب هدف زي انه يحصل على مجموع معين او انه يدخل ثانوي عام او يدخل كليه معينه.
5- فقدان الدافع
خامس حاجه تعطل الطلاب عن التفوق الدراسي عدم وجود دافع ، فيه قانون من قوانين التعلم بيقول لا يتم التعلم بدون دافع ، الدافع يدفع الطالب لتحقيق احلامه من خلال المذاكره ، زي ان الطالب يقول لنفسه انا بذاكر علشان المذاكره طاعه لله ورسوله ، لان طلب العلم فريضه.
او انا بذاكر علشان احقق ذاتي او ارفع مستوى اسرتي او انا بذاكرعلشان ادخل كليه الطب مثلا واساعد في علاج الناس او انا بذاكر علشان احصل على الهديه اللي بابا قال لي عليها.
6- سيطرة الرغبات
سادس حاجه تعطل التفوق الدراسي سيطره رغبه معينه على الطالب ودى هنتكلم فيها كتيرلأن معظم الطلاب اكثر حاجه بتمنعهم من التفوق الدراسي سيطرة بعض الرغبات عليهم ووصولهم لمرحله الادمان
- زي ادمان لعبه معينه على التليفون او الكمبيوتر يعني الطالب، اللي بيقعد بالساعات يلعب على الكمبيوتر هيعرف يذاكر؟ طبعا لا لانه بيكون تعب لان الالعاب بتسحب طاقته النفسيه والجسميه والعقليه وبيبقى عاوز يرتاح بعد المجهود العقلي والنفسي ده كله وطبعا المذاكره نفسها محتاجه مجهود نفسي وعقلي وبدني.
- وفي بعض الطلاب ادمنوا مشاهده التلفزيون او السوشيال ميديا وطبعا دي بتسرق وقتهم ومجهودهم او بمعنى اصح بتسرق حياتهم كلها.
- وفي بعض الطلاب ادمنوا الموبايل وقاعدين عليه اغلب اليوم وطول الوقت منتظرين المكالمات واللايكات وغيرها وبالتالي مش هيركزوا في المذاكره.وفي بعض الطلاب ادمنوا لعب او مشاهده مباريات كره القدم وبالتالي مش هيلاقوا وقت للمذاكره.
- وفي طلاب ثانيه سيطرت عليهم الرغبه في النوم ، بينام علشان يصحى ويصحى علشان ينام وطبعا كتر النوم يجيب كسل وخمول وكثره النوم سواء لسبب عضوي او لسبب نفسي يعتبر هروب من الواقع لان الطالب مش عايز يتحمل المسؤوليه وطبعا كثره النوم بتضيع وقت الطالب وبتخلي ما عندوش وقت للمذاكره وتلاقي بعض الطلاب يقول لك نام وارتاح ياتيك النجاح.
- وفي بعض الطلاب في مرحله المراهقه بتسيطر عليهم رغبات عاطفيه وعايشين يفكروا في الجنس الاخر اغلب الوقت وبالتالي مش قادرين يركزوا في المذاكره. في بعض الطلاب ادمنوا السهر وقلبوا ليلهم نهار ونهارهم ليل طبعا كثره السهر ده بيدمر الجسم والنفس والعقل وبالتالي هيقل مجهود الطالب ومش هيقدر يذاكر.
- وفي بعض الطلاب ادمنوا المخدرات وطبعا دول حياتهم كلها معرضه للضياع مش بس ضياع المذاكره و التفوق الدراسي المهم ان سيطره بعض الرغبات على الطلاب تخليهم مأسورين بيحبوها وما بيحسوش بالمتعه الا معاها وكمان هيكره المذاكره اكثر لانها بتحرمه من تحقيق رغبته.
7- العناد
سابع حاجه تعطل الطلاب عن التفوق الدراسي العناد والتمرد لدى الطالب احيانا بيبقى في طالب عنيد ومتمرد على الوالدين وطبعا هما عاوزينه يذاكر وبالتالي هو ما بيذاكرش علشان يعند معاهم خاصه لو الوالدين بيضغطوا عليه كتير علشان يذاكر وكل ما يضغطوا عليه اكتر يحس بالقهر اكثر فيعند معاهم ويبعد عن المذاكره .
وطبعا يزداد العناد والتمرد عند الطلاب اللي بيتعاملوا بقسوه زايده ويظهر العناد بصوره كبيره في مرحله المراهقه وبالتالي المراهق يرفض المذاكره اكثر من الطفل ويعند اكثر لو منعوا عنه عوامل الترفيه زي التليفون وغيره فيحس ان المذاكره سبب حرمانه من الحاجات اللي بيحبها فيكره المذاكره ويزيد العناد.
لما الابن يحس انه بيحقق رغبات وطموحات واحلام الوالدين مش احلامه هو فبالتالي ما يذاكرش وكانه بيقول لنفسه مش هذاكر لكم المهم ان العناد والتمرد من اكثر معطلات عن المذاكره والتفوق الدراسي فلازم تغيروا اسلوبكم مع اولادكم .
8- غياب القدوة الحسنة
تامن حاجه تعطل التفوق الدراسي تقليد الطالب لشخص لا يذاكر، فكثير من الطلاب ما بيذاكروش تقليدا لشخص ما ما بيذاكرش سواء
اخ اكبر او صديق واحيانا في طالب عاوز يقلد نموذج ما حقق شهره على السوشيال ميديا او حصل على فلوس كتيره من لعبه معينه او شغلانه معينه بغض النظر عن ان الفلوس دي حلال ولا حرام.
المهم المراهق بالذات بيبقى عاوز المكسب السريع وبدون تعب وطبعا المذاكره لسه مكسبها بعدين لما يتخرج فيحس ان المذاكره بتضيع وقته اللي ممكن يجيب فيه فلوس دلوقتي.
وطبعا اللي زود مشكله رفض المذاكره خاصه عند المراهقين غياب القدوات الجيده وعلى العكس انتشار وظهور القدوات السيئه طبعا بالاضافه الى غلبه القيم الماديه في عصرنا الحالي لدرجه ان كثير من الطلاب بيقولوا ان المال اهم كثير من العلم.
9- صعوبات التعلم
تاسع حاجه تعطل التفوق الدراسي وجود صعوبات التعلم عند الطالب، فممكن الطالب يبقى ذكي جدا لكن يتعطل عن المذاكره والتفوق الدراسي بسبب انه بيعاني من مشكله صعوبات التعلم ، والمشكله دي بتنقسم لقسمين صعوبات التعلم نمائيه يعني وجود مشكله عنده في الانتباه والتركيز او التذكر.
وصعوبات تعلم اكاديميه يعني وجود مشكله عنده في القراءه او الكتابه او الحساب وبالتالي الطالب مايقدرش يذاكر لانه مش قادر يقرا اللي مكتوب على السبوره او اللي مكتوب قدامه في الورقه واحيانا يكون عنده صعوبات تعلم في ماده معينه فيكره الماده دي
ولما يكون طالب عنده مشكله في التذكر يعني كل ما يذاكر ينسى اللي هو ذاكره طبعا هيزهق ويحس بالفشل.
10- الاعتمادية
عاشر حاجه تعطل التفوق الدراسي اعتماد الطالب على شخص او شيء ما ، يعني اذا كان الطالب بيعتمد على الام من صغره في المذاكره فلا يمكن يذاكر الا اذا كانت والدته قاعده جنبه ، وفي طالب ما بيذاكرش لانه معتمد على فلوس والده، واذكر فى مره قالى طالب لما سالته ما بتذاكرش ليه؟ قال لي احنا اغنياء جدا.
وعارف زمايلي دول يا مستر اللي بيذاكروا شادين حيلهم دول كلهم اشغلهم عندي، والمشكله الكبيره ان في طلاب كتير ما بيذاكروش لانهم معتمدين على الغش في اخرالسنه عارفين انه في نهايه السنه هيغش وقالهالى طالب انا ليه اذاكر واتعب نفسي وانا عارف ان احنا هنغش في الامتحان.