10 نصائح أساسية للنجاح في الثانوية العامة
اكيد كلنا عارفين ان الثانوية العامة هي اهم سنة من السنوات التعليمية اللي بتمر على كل طالب، عشان هي السنة اللي بتحدد مستقبلك الجامعي وبالتالي بتحدد مصيركالمهني، هتشتغل ولا مش هتشتغل بعد الجامعة ولو اشتغلت هتشتغل ايه وهتاخد كام؟ |
| 10 نصائح أساسية للنجاح في الثانوية العامة |
الحقيقة ان فيه كتير جدا من الطلبة مش عارفين يتعاملوا ازاى مع السنة المصيرية دى وبالتالي بقعوا في اخطاء كتير بتعطلهم عن النجاح والتفوق.عشان كده قررنا اننا ننقاش الموضوع ده على موقع مدرستنا التعليمي ونقدملك يا طالب ثانوية عامة 10نصائح أو اخطاء لازم تبعد عنها وخصوصا في النظام الجديد سواء كنت منتظم او خدمات او منازل، تابع معانا.
1- حماس البدايات:
اول خطا بيقع فيه معظم الطلبة هو حماس البدايات وطبعا كلنا سمعنا قبل كده ان الثانوية العامة عبارة عن ماراثون طويل بيحتاج صبر ومثابرة واستمرارية ، والخطأ اللي بيقع فيه طالب ثانوية عامة انه بيتحمس جدا في البداية وبيحاول يغير نظام حياته 360 درجة ويقرر انه يذاكر عدد ساعات طويلة كل يوم ويلغي كل الانشطة اللي كان بيمارسها.
لكن التغيير المفاجىء ده مش بيستمر كتير وبعد فترة قصيرة جدا يلاقى الطالب نفسه مل من المذاكرة في الثانوية العامة فلازم هنا مجهودك يزيد بشكل تدريجي علشان ماتقعش في هذا الخطأ الكبير اللى ممكن حرفيا يوقفك في اول الطريق.
2- التشتيت:
تاني خطأ بيقع فيه الطالب هو التشتيت بين مصادر المعرفة والمذاكرة وده بسبب انتشار عدد كبير جدا من المنصات التعليمية سواء المجانية زي يوتيوب او المدفوعة زي حصص مصر وغيرها ، والحقيقة ان ده ميزه وعيب في نفس الوقت ، عشان كده بنصحك لو بتاخد دروس يبقى كفاية عليك المدرس بتاعك مع مدرس واحد فقفط علي يوتيوب لنفس المادة مش اكتر من كدة علشان ماتشتتش نفسك.( افضل المدرسين على يوتيوب
3-عدم التطبيق:
تالت خطأ بيقع فيه طالب ثانوية عامة وهو المذاكرة بدون تطبيق ودي عاملة بالظبط زي اللي بيتعلم السواقة بشكل نظري لكنه عمره ماساق عربية فأكيد اول مايركب العربية مش هيعرف يسوق ، والتطبيق هنا معناه ان اى درس اخدته عشان تعرف انت استوعبته ولا لأ لازم تحل عليه اسئلة من اى مصدر سواء المدرس بتاعك او من على اى مصدر زي منصة نجوي التعليمية ومنصة ذاكر الان ويفضل انه يكونوا الاتنين مع بعض.
4-عدم المراجعة:
والنقطة دي مرتبطة بالنقطة اللي قبلها ، بمعنى انك لما تيجي تحل اسئلةلازم تتأكد من اجابتك ان كانت صح ولا خطأ ولو صحيحة يبقى انت تمام وزى الفل أما لو كانت خطأ فلازم تراجع الجزئية دي من المنهج واتحداك لو نسيتها بعد كده ، عشان كده يفضل انك تحل مع المستر بتاعك او من على موقع كويزات.
5-السوشيال ميديا:
انا شخصيا بعتبر ان السوشيال ميديا من اخطر الاخطاء اللي بيقع فيها طالب ثانوية عامة لانها من اكبر المصادر اللي حرفيا بتسرق الوقت وانا بصراحة ضد الناس اللى بتقول ان الطالب في البريك ممكن يتصفح السوشيال ميديا، انا انصح انه يمنعها خالص في سنة الثانوية العامة لانها بتسرق وقت البريك واللي جنب البريك وماحدش بيقدر يتحكم في نفسه حتى الكبار.
6- التسويف:
التسويف مشكله شكلها سهل لكنها فى الاصل خطيرة جدا لان الطالب عن طريق التسويف ( التأجيل يعني) بتتراكم دروس كتير على الطالب بحجة انه ممكن يخلصها مره واحده، لكن الحقيقة ان ده مابيحصلش وبيفضل يأجل ويأجل لحد مايلاقى نفسه في النهاية قدام جبل من الدروس المتأخره واللي بتسببه ضغط عصبي كبير عشان كده بنصحك اول بأول تخلص دروسك.
7- القلق:
الثانوية العامة سنة عادية لكنها محتاجة مجهود اكبر وتركيز اكتر وده مش معناه انك هتذاكر 24 ساعة وتضغط على نفسك بشكل كبير ، كل المطلوب منك انك تكون انسان ملتزم وعارف ايه اللي وراك وتخلصه اول باول زي ماقلنا قبل كده ويبقى لك مساحة لحياتك الطبيعية زي الخروج مع الاصدقاء او مشاهدة التليفزيون واعمل اللي عليك والنتايج دي بتاعة ربنا سبحانه وتعالى.
8- المقارنة:
اوعى تفكر ان تفوق اى حد من اصحابك في مادة معينه ده معناه بالضرورة انك فاشل وان هو ناجح لان المقارنة دي مافيهاش عدل وهتدمرلك نفسيتك ، لأن كل واحد فينا له ميول وقدرات خاصة مختلفة عن التاني فماتخليش امتحانات الدروس مقياس لنجاحك او فشلك لانها مجرد تدريب علي الامتحانات من خلالها بتقدر تعرف نقاط ضعفك وقوتك في المادة وبالتالي بيبقى عندك فرصة لتحسين مستواك.
9- البخل:
اوعى تبخل بمعلومة انت عارفها لصحابك او زمايلك في الدرس وتقول لنفسك انا كده هبقى مميز ، بالعكس مساعدة زمايلك في الدرس بمعلومه هما مايعرفوهاش او شرح سؤال ليهم ده في حد ذاته نوع من انواع التدريب والتجويد وتثبيت المعلومات في دماغك ، ده غير طبعا الاجر والثواب عند ربنا ( فخير الناس انفعهم للناس) حديث عن الرسول صلى الله عليه وسلم.
10-الاستسلام:
لو وقعت في نص الطريق والدروس اتراكمت عليك والوقت عدى منك ومش قادر تكمل اوعى تستسلم للفشل ولازم تقف وقفه مع نفسك وتحط ايدك على العقد وتبتدي تفكها واحده واحده لأنك لو حاولت تحل كل المشاكل مره واحده مش هتنجز ولا واحده وصدقني كل ماهتحل عقده هتلاقى التانية بقت اسهل وتأكد ان النجاح هو مجموعة تجارب من الفشل.
الخاتمة:
انا عارف ان الكلام سهل تقراه وتحفظه كمان عن ظهر قلب لكن التطبيق بيبقى صعب ، لكن عاوز افكرك بحاجه مهمة جدا ان الثانوية العامة سنة واحدة بس لكنها بتحدد بعد كده انت مكانك فين في المجتمع وسط الاصحاب والاهل والمعارف اعتبرها زي الحقنة اللي ببتحمل المها عشان تخف من المرض …. ياريت تسيبلنا رأيك في التعليقات ونلقاكم على خير في المقالة القادمة.